Thursday, December 18, 2008

Zanteank xittkavnni

Zanteank xittkavnni





Zannteponnar zait opghat
Zotnai ghe dis-rat

Pois kor Veasonam
Jivit tujem sartana

Veasonamni zata kankr
dekun tim pois kor

Jevnnant unni korchi chorbi
rakhunk bori bholaiki

Sovkas korchim kamam
Pois korun chitnam
Na tor zatlim
roktadabachim lokxonnam

Dovorchem kelem zor
Zannteank Vrudhaxromant
Tum-i zatlo zannto
Hench dhor tujea monant.

Bicaji Ganecar

Bhurgim acho fuddar

kovita

Bhurgim acho fuddar






Suknnea pilank futtle dolle
Gulabache ful’le kolle
Utt ixtta, utt polle
Sang tuje umalle
Sokall zali ugodd dolle
Samballunk tanchea fuddarache kolle.

Kitlea zannanche katorle golle
Thoddeanche kaddle dolle
Fuddar tancho fulche adinch
Bavle tanche kolle.

Xallamni dhaddche bodlek
Bhurgeank xetamni dhaddle
Xetant pik ailem
Punn bhurge, pokea konnsamni vaddle.

Sobit bagent tem vaddlem
Avoi-bapain taka ximplem
Punn fulche adinch
Taka pisuddlem.

Ixtta, aiz zobabdari
Tuji ani mhoji
Rakhonn korunk fultea kolleanchi
Korunk meklli, vatt tanchea fuddarachi.

Milton R.

Monday, November 03, 2008

Devacho ghutt

Devacho ghutt


Nirxel’lea dolleamni mollbak pollelem
Punn tum ailoch na
Mollbar kallim kupam dislim
Punn zomin bizlich na.
Jivitachea darvonttear,
Novo suria udeloch na
Chokchoktim kirnnam
Kallzachea umbrear pavlinch na.
Sodanch tuka udok ghalem,
Noveo komreo futtleoch na
Kolleacho gulab fultaso dislo
Punn tambddo rong ailoch na.
Ratichim sopnam,
Ugddas pasun urloch na
Sopnel’lim chintnam,
Jivit aiz bodol’lench na.
Ambeachem zhadd vaddlam,
Novim fulam dhorlinch na
Kitlim aiz vorsam zalim,
Foll tachem chaklench na.
Jivitachem umannem
Aiz konnench soddoilem na
Devacho ghutt Devuch zannam
Konnakuch khobor na.


Schol. Milton, Pilar Niketan, Nagpur

Bhorti ani sukti



Bhorti ani sukti


Tinsanjechea vellar
Veller gelem doria bhettek
Lokanchi zag na
Vattek konn na
Zannto doria aplo
Sangta zaiteo kannio
Eksuroch koso dista to
Sangtana apleo kannio
Modench paim sanspita
Ani gitam gaita.



Aplea vangdda mhaka
Khellunk apoita.
Magir mat to
Gitam bodla gorzunk lagta
Hikmotin ani gorvan to
Apleaxim mhaka oddunk sodta
Punn babddo piso to
Thoddeach vellan sukti yeteli
Hem mat to visorta.

Valeneta D’Cruz

Jezuk Mellunk Zai?

Jezuk Mellunk Zai?

Kristak sodunk
Nodi par korchi goroz na
Taka mellunk
Dongor choddun faido na
Tuzo bhav
Piddent koxttovta taka bhett di
Tuzo xezari
Dukhin tollmollta taka buzvonn di
Kristak vollkunk
Tujea bhavachea rupkarak polle
Jivo Krist mellunk
Tujea dusman xezarak mogan vengoi.
Tujexim pavunk Somia
Retir magnnim keleant
Punn,
Darant pavlelea gorjevotank
Ghorachim daram dhampleant.
Igorjek dan dilam
Nanv khambear chitrailam
Punn,
Voizachi goroz asleleank
Jivit mornnak pavoilam
Potta-Kerala povitr zagear
Vorsantlean don pavtti
Punn,
Xezari dukhachea konddant
Matui vell na, daktti bhett korchi.
Jezu Kristacher nodor ghalunk
Mottvo Zakev zhaddar choddlo
Aicho monis voir sorunk
Duddvanchea pattlean gelo
Devmondir ek magnneanchem ghor
Maglear mellta, darar mar, dar ugoddta
Aicho monis aple dolle dhampun
Disun kurdd’do, aikunk bhero zata
Suyechea burankantlean untt pasar zat’lem
Punn gorvixttank sorg darvontteantlea vochun nhoi sompem
Aicho monis unchlea zagear vochun boschem
Voilem pan sokoileak hansun, bhuim poddlem.



Lino B. Dourado (Utodd’dekar)

Jivitachi pon’tti

Jivitachi pon’tti




Jivitachi pon’tti pettonuch urchi
Fultim-fulam pormollot ravchim
Suriachim kirnnam ximpddot vechim
Kallim kupam pavs zavn zoddchim.

Tela vinnem pon’tti pettch na
Zhadda vinnem ful fulchem na
Uzvadda vinnem suria ievcho na
Kupam vinnem pavs zoddcho na.

Jivitachi pon’tti oxich pettom
Pormoll fulancho osoch pormollom
Kirnnam mogachim ximpddot vochom
Kallim kupam jivitant na disom.

Pon’tti mogachi petton
Kallok sogllo pois vochom
Ful mogachem pormollom
Pormoll soglleak ximpddot vochom.
Kirnnam mogachim ximpddom
Jivitant sogllo uzvadd disom
Kallim kupam zoddun
Jivit portun novem disom.

Milton R. Nagpur

Hanv Khoim Chuklom?


Hanv Khoim Chuklom?

Hanv ek tornatto, kolejiksan ghora ietalom
Xikop korun vhodd zavpacho haves aslo
Punn tea bomb-sfottan mhaka marun uddoilo
Sang Jezu hanv khoim chuklom?

Hanv ek avoi, bhurgim mhojim lhan
Tanchem pott bhorunk don voranchi kaddtalim vatt
Punn tea bomb-sfottan morun bhurgim zalim onath Sang Jezu hanv khoim chuklim?

Hanv ek bapui, khoxalbhorit ghorabo amcho
Jivit khoxal zavnk hanv ek bhorvanso tancho
Tea bomb-sfottan ghat ghetlo mhozo
Sang Jezu hanv khoim chuklom?

Mhoji avoi zannti konnuch naslo adar divpi
Mhojea dhiran jivit umedin ti sari
Tea bomb-sfottan keli mhoji chetnni
Sang Jezu hanv khoim chuklim?

Hanv ek xikxika, xikovnn ditalim porikxa
Xikun bhurgim vhodd zaunchim hich mhoji itsa
Tea bomb-sfottan keli mhoji durdoxea
Sang Jezu hanv khoim chuklim?

Jezu uloilo, Dev zavn hanv gorib koso zolmolom Sodanch hanvem soglleank dilo alaxiro
Punn chuchure korinastana
Tannim mhaka khursar marlo
Sang mon’xa Hanv Khoim chuklom?

Vicharak na ek-ui zabab
Zababachi soglleank laglea tan
Borem korit voch, hench amchem avhan
Jivit lhan - vhodd zaum, zai kallzachem somadhan.


Sr. Willber, H.C.
St. Alex Konvent Kalangutt

Ravat

Ravat


Ravat, ravat mhaka marum nakat
hanv tumkam savlli ditam,
fulam ditam, follam ditam,
yad korat.
Futti koddi-solam mhojim
Uddmethi-amttann mhoji
Rob’bor-mhozo dikh
Mezam-kodelam sailachem pik
madd mhoje vanxe
Kajuchea biyank “foren” avoddta
Forena poros kajel, maddel avoddta.
Mhaka marit suttlear
nimannem magir tumchea
hatant mhojeach maddachi
mhojea nal’lachi’
Mhojich kott’tti
bhik magunk.....

B. Ganecar

Ami Svontontr!

Ami Svontontr!


Fokt mhunnchem vo ami chakchem
Kallzantlim svotontr bavnnam, dukhta toslim kolponam
Kurdd’deank ani bhereank boroileam,
Moneam-tontteamni aikoleam,
Chitrkaramni ani potrkaramni dhampun dovorleam.

Kurdd’do Bherechea khanddar, tontto monechea buzar
Eka mekachea khanddar svotontrtayêchem Bhandar
Potrkaramni bhorlolim, chitrkaramni dakoilem
Lok-somporkachim sadnam (media) svotontrtayêchem varem ailem

Svontontr monis durdristi aslo
Povitrtayêchea ani lokachea mogan laslo
Apleak lasoun nagrikank uzvaddacho uzo dakoilo
Onit ani bhroxttachar lasun uddoilo.

Ami Svotontr! Ami Svontontr! Hoch amcho naro
Monacho dhull ani gulamponnachem bhutt korta amcho parho
Totvamni bhorlolo amcho tallo, Svotontrtayêcho pillo
Nazuk to khoro, Sallok koso amchea tolleant fulcho

Feroz

Uzvaddachim kirnnam fanklim

Uzvaddachim kirnnam fanklim


Uzvaddachim kirnnam fanklim,
Kallkim kupam dhanvlim.
Gulamponnache bandpas soddun,
Aiz svotontr zaunk pavlim.

Aichea disa khoxalkai bhogta,
Itihas amkam sakxi dita.
Gorvan amchem horddem fulta,
Niyallun ti tyagachi kotha.

Soinik Bharot Maiche,
Dusmanam lagim zhuzle.
Desachea obhimana khatir,
Apunnuch bolidan zale.

Sobar vorsam sorun gelim,
Desachi zaiti unnoti zali.
Punn bhav-bhoinnam koxim,
Mogan jiyeunk ami visorlim.

Novean suria kednam fanktolo?
Bhorvanso kednam udetolo?
Desacho bhangaracho fuddar,
Amcheach hatamni bandun haddcho.

Francis X. Fernandes, Nagpur

Khoxechim gitam

Khoxechim gitam

Khoxechim gitam gailim hanvem
Mollob jednam zalem dhovem
Jivit aiz ful’lem novem
Sukhachim kirnnam deklim hanvem.

Mogreche kolle ful’le porsant
Pormoll tancho kitleach vorsan
Uzvadd nasun jiyelo kallokant
Suria aiz udelo jivitant.

Suknneamni mhaka sangat dilo
Vareachea nettar madd dhol’lo
Lharancho avaz kanar sadlo
Paktte fuloun mor nachlo.

Dukham golloun roddlom hanv
Aiz portun uttlom hanv
Novo suria polletolom hanv
Chan’neant vatt choltolom hanv.

Uzvadd jivitant samballtolom
Kallokak pois ravtolom
Divli jivitachi pettoun
Uzvaddachim gitam gaitolom.

Milton R.

TEM AZUN CHINTA

TEM AZUN CHINTA

Tea disa amger ailem ek por,
Ek avoi tika gheun sorli bhitor,
Bhavan mhojea bhair dhanvddaunk marlo fator,
Punn avoin mhonnlem “tika asum-di hangasor.”

Tea disa thavn tem zalem mhojem ixtt
Jevnna vellar mhaka tenkun roddon gaitalem git
Mhoje-xim boson boxentlem jevtalem xit
Tenkun bosta tea pormannem mat-ui nasli rit.

Kednam hokol mhoji, amger ietali,
Tednam hoklek bhiyeun tem bhitor dhanvtalem,
Ratchem jevun mhojea kuddant liptalem,
Nhidunk bizli paloitoch mhoje-xim ievn nhidtalem.

Ami korunk vetanv tednam rozar,
Roddtalem boson tem amchea bankar,
Tednam bhav zatale ticher bejear,
Ragan marunk tika boddi kortale uzar.

Hanv mavodde ravun tika ritem dislem ghor,
Mhaka lagon roddon azun korta dukhanchi zhor,
Bhav tika mhonntat, “roddta kiteak? Jiv diun mor!”
Mhaka lagon azun dis- rat chinta mhojem mazor.

Cirilo Noronha, Chinchinim

Jivitachi sangatin tum

Jivitachi sangatin tum

Niktoch pavs thamblo
Ani koddok vot ailem
Tum portun mhojea sangatak!
Tunvem mhaka,
Portun aplo sangat dilo.
Itlo vell hanv ekttoch choltalom
Punn atam!
Mhojea sangatak tum asa.
Hanv kainch ek uloilo nam
Mhaka tunvem sodanch
Sangat diuncho,
Ani kednach soddun vecho nhom,
Oxem mhaka dislem
Punn suriachea kirnnancher
Kupam ailim,
Ani tuvem mhaka ektteakuch sanddlo.
Soglleak savlli asli,
Punn tum…?
Hanv sintidant ailom
Tednam mhaka somzolem,
Tum mhojea jivitachi sangatin khori…
Punn tum….
Tum mhojich savlli (shadow) asli.

Milton R.

Chitt

Chitt

Tuka chitt borounk
Mhaka mhojea bukachem
Pan toddchem poddlem
Punn, tem pan mhaka,
Tujea moga poros vhoddlem nhoi
Kiteak, tujeach jivitantlem sukh toddun
To buk tuvem mhojea hatant dilo.

Tuka chitt borounk,
Mhaka mhojem,
Pen sompounchem poddlem.
Punn, tem pen mhaka,
Tujea moga poros vhoddlem nhoi
Kiteak, tuvem tujem ordem jivit sompoun,
Mhaka vachunk-borounk xikoilo.

Chittir zaiteo chuki asleo
Teo chuki sarkeo korunk(pusunk),
Mhaka mhozo,
‘Rubber’ kabar korcho poddlo.
Punn, to ‘rubber’ mhaka,
Tujea moga poros vhoddlo nhoi
Kiteak, maim…
Tuvem mhojea jivitantleo chuki pusun,
Tacheo volli (lines) portun boroileo.

Tum xikloli nasun legit
Tujea putak tunvem xikoilo
Bori dekh tuvem dili,
Hachea vhodd xikop anik khuim mellot?
Utram aikon, dolleant tujea dukham gollot,
Dev borem korum maim,
Tuje osli maim anik khuim mellot?

Milton R.

Noman Romi Lipyek

Noman Romi Lipyek

Konknni bhaxe, tuk' kortam ami noman!
Tum zali mhonn Rajbhas amchea ganvchi,
Tantum mellunk pavlem Ghottok-raj amkam,
Jem zaun aslem sothea amkam soimbachi.
Torui dusro xevott aslo hacho,
Ghott korunk Gõyam ekvott Gõykarancho.
Ek bhas, ek des, tach' vorvim ekuch porza,
Hi zaun asa vhodd politik-filosofi.
Don bhaso zhuzleo apleak gheunk ek Goa,
Konknni jikli, arrun geli Moratti.
Punn Morattivale zaun xanne kole,
Tannim dhampun haddle Konknniche dolle.
Bhuloile Konknnik, des-bhoktichea nanvan:
“Romi lipi naka, ti zaun Eropi,
Ti Gõyam haddli Purtuguez soitanan;
Amchi dexi lip as' “Devnagiri.”
Zaite Romin borovpi haka bhul'le,
Moratti ravle zage, Konknni nhidle.
Zait zaiteank puttonk na hem sot porgottunk,
(Bhivon mhonnot mhonn Purtuguezacho lembddo);
Ki Romi lipyen sompem ekvott zoddunk,
Nhoi fokot Gõy, punn akh’khe Indiecho;
Zoxem korun ghetlem bhair vhodd desamni,
Tanche voir thoddi vollokh gheum-ia ami.
Poilem Sonvsari Zhuz somp'sor, Turki ganv
Vapddi Arabik lipi Turki borounk;
Punn 'Attarturk' podver ietoch, (vhodd tach' nanv!)
Formailem Romi lipien Turki xikounk.
Romi lipyen sompi zaun, vaddli ti bhas,
Aiz Evropak porzollta ticho porkas.
Asat zaite vhoddle des Asiak, zannim
Arab lipi nikllaun Romi vapuddli.
Pon’nas vorsam pattim des Indones-in,
Apli bhas Romin borounk suru keli.
Tanche dekhin Singapor, Malaysia,
Apleo dexi bhaso Romin boroitat.
Hem sompeponn ami khud zanno Gõyam,
Chodd konn khoreponnim xiklona Konknni;
Ti maim-pain uloileli aikon ghorant,
Xiklom ulounk, borounk soronk na pattim.
Inglez vo Purtuguez borounk zanno zaun,
Konknni borounk zal' sompi, nastana lisaum.
Gõy zaun aslem Roma Udentichem,
Gõykaramni korantlem vhoddlem nanv,
Zor Romi lipyenuch borounk tharail'lem
Ani Indiek dilelem hem lisanv.
Konnachean-ui sompi xikunk zait asli,
Zaunk ti bhas Tamil, Hindi vo Guj'ratti.
Kotta, Gõykaramni chukoilem tarum,
Mandun gheun Devnagorin Konknni borounk.
Ai, des-bhokteamni polleyat tumi chintun,
Kitlem borem zat'lem aslem ami dakounk:
Ek bori dekh Indiek 'Romi' lipi vorvim,
Punn kotta, hem konnem chintlemna tumi.
Chint-ia ami nhoi Konknne vo Kristanv mhunn,
Bogor put ani dhuvo Goa-mainchim.
Choddam potram, oi, ietat Romin chhapun,
Tim adim, Kristanv, Konknneamni vachlim.
Kiteak atam kortanv ami vegllikai,
Ani mhonntanv Devnagri lipi zai.
Xekddebhor Romi lipyen chhapli Konknni
Potram: ‘Udentechem Sallok,’ ‘Sot,’ ‘Uzvadd,’
‘Udentechem Neketr,’ ‘Goa Times’ ani
‘Vavraddeancho Ixtt,’ ‘Gõykar’, ‘Rotti,’ ‘Gulab.’
Romi lipi zalea amchem herderiponn,
Tem ami samballum-ia ekvottan ravon.
Polle, Romi lipyen borovpi uttleat,
Zage korunk tumkam je as' susegad;
Ekvottan tumi soglle adar diat,
Salvar korunk Romi lipyechem bhiradd.
Hanv Romi lipyent borovpi pordesant,
Kallzan thavn kortam tumkam soglleank Noman!

Basilio Magno (Goykar,rauta “Spain”-ant)

Pavs Trasant Ghalta Tedna...

Pavs Trasant Ghalta Tedna...

Sotri vhorunk visrum naka
Sundorên xiddkailo mhaka
Bharik-motto pavs zhoddta
Bizlear thonddi zait tuka

Kitlo mhonn tigelo husko
Mhojea bholaikechi kallji gheta
Pavs zhoddum vo na zhoddum
Sotri mhojea hatant dita.

Bazarak vetanam sotri dileli
Khoim-ga tunvem dovorli?
Vetana pavs, yetana ôt
Oxê torên chouti sotri xennoili.

Naka gê! Sotrêchi goroz na
Mollbar uzvaddik surya porzollta
Pavsacho kall, atam pavsak nem’ na
Vetana ôt aslear, yetana pavs ghosghoxeta

Ani tea disa toxench ghoddlem
Pavsan mhaka chikann kelem
Bazar sompoun ghora yetana
Thambonastana pavsan dhorlem.

Xezarnnin aplê sotrên asro dilo
Ghora merên mhaka pavoilo
Mhojê sundorêcho bezo uddlo
Zogllavmni nastana goddgoddo suru zalo

Hozar sotreô xennoilear zatat
Punn lokachea bailank tenkum naka
Pavsant bizun thonddi-zor ailear zata
Punn lokachi ub ghevun mhojea fuddean yenv naka.



Lino Dourado
www.goa-world.com
libado23s53@yahoo.com

Jivitache onnbhov

Jivitache onnbhov



Dukhachê ghôddiêk dukamni roddlom
Sukhacho khell harunk pavlom
Hartam-hartam jiktaso dislom
Jikta-jiktanch harlom.
Eksurê jinnênt eksuroch ravlom
Ixttacho sangat sodunk bhonvlo
Bhonvta-bhonvtam melltaso dislo
Melltam-melltanch sanddlo
Kallokhi kuddint, kallkhantuch ravlom
Suriachea uzvaddak axelom
Axeta-axetam thoinch boslom
Bosta-bostam thoinch nidlom.
Jivitache onnbhov onnbhovunk nam
pavlom
Chintnachê nodint buddunuch ravlo
Buddta-buddtam mortaso dislo
Morta-mortanch vanchlom.
Fokannam korun fokannanch xiklom
Dukh ailear pasun nam roddlom
Roddta-roddtam hansunk xiklom
Hansta-hanstanch roddunk visorlom.

Milton R.

IXTT

IXTT

Tum mhojea boreponachim sopnam sopnelo koro
pun tujea boreaponachim tum sopnam sopnetanam
havunch tuka uttavun gelom
zaun xitol varo
anik tujea sopnatchea sagorant
tuven mhaka sodlelea motiamcho
haven tukach gutla ek ixttagoticho turo
toshech tujea sandlelea motiani
noketrachea rupan
soglea sovnsarank gatla re gero.


Jovito Rodrigues.

Moronn

Moronn

Jivitachea xant doryant
Mornnachim aiz ubzolim lharam
Jinnek axet ravtale
Jinnechinch aiz dhamplim daram.

Mornnan soglleak kallok zala
Dukhanchim aiz zaleant lharam
Jivitacho orth sodtana
Monim zaleant mogachim utram.

Jivitache bagimni
Jivitachinch fultalim fulam
Pormollak axet ravtalim
Pormollche adinch bavlim fulam.

Jivitachea mollbar
Chokchoktim suryachim kirnnam
Jivit uzvaddaunche adinch
Suryachea tonddar ailim kupam.

Jivitachea ghontterant
Suknneamni gailim gitam
Mogache sur sodtana
Mogachinch aiz sanddlim utram.

Milton R.

Khoxal Zayat

Khoxal Zayat

Khoxal zayat, sontosbhorit zaiat,
Gayonam korat, gitam gayat,
Sonvsarant vhodd vizmit ghoddlem
Ankvar Avoik ballok zala
Noketr udelam mollob pettlam
Soglleak aiz prokas fankla
Ballka zolm’ kollit zala
Gorvam gotto bhagi zala.

Sorg sanddun Dev sonvsarant aila,
Vaitt soddun, jivit nettoum-ia,
Ballok Beleacho, Soddvondar amcho
Taka ghevnk aitim zaum-ia.
Noman Tuka, ievkar Tuka
Amchea Raya, Ballka Jezu
Amchea ghorant, amchea kallzant
Amcho Tuka ievkar aiz.

Menino Almeida, Fatorda

Sopnel'lim sopnam

Sopnel'lim sopnam


Sopnel'lim sopnam sopnanch urlim
Uzvaddachim kirnnam dolleant na bhorlim
Porzollit sopnam uzvaddant na ailim
Chondrim liplo, suryachim kirnnam na dislim.

Fultim-fulam fulche adinch bavlim
Kallim kupam dukam zavn denvlim
Sopnel'lim sopnam sopnanch urlim
Uzvaddachim kirnnam dolleant na bhorlim.

Khoxeche dis, sopnanch aslim
Dis toxinch vorsam dhanvlim
Sopnel'lim sopnam sopnanch urlim
Uzvaddachim kirnnam dolleant na bhorlim.

Kallzachim dukam toxinch urlim
Xekim aiz novem zavnk pavlim
Chintlolim sopnam, chintnanch urlim
Sopnel'lim chintnam, sopnanch ravlim.

Milton R.

Kallzachi Nod

Kallzachi Nod


Mannkulo jiv mhozo, oso koso fulun aila
Cholta-cholta astana, ekttinch hansunk ravleam
Nodor ugti dhorun, hanv sopnam polletam
Dolle chotur korun, tukam pollevnk axetam

Kanar mhojea tujim, mannkulim utram sadovtat
Chintnam mhojea monantlim, sangche adinch buddovta
Suknnea porim uddun, akaxant bhonvddi martam
Kallzache bagent mhoje, mogachi fulam soboitam.

Chor dolleamni khellun, varea borabor lipleam.
Gimachea mhoineant mhaka, pavsachi axa laglea.
Kallzachi veg polle, aiz odikuch vaddlea
Jivitachea doryant mhojea, mogachi nod liplea.

Selza Lopes

Ul’las mhoje

Ul’las mhoje

Ixtt to mhojea mogacho,
Suryachea Kirnnam porim jivitant riglo.
Fulam porim borea gunnacho jhelo,
Jivitant mhojea bodol haddlo.

Ixttagotichem zhadd Deva kurpen ximplem,
Vadoll-moddam modem Devanuch samball’lem.
Uzvaddit jivit zaunchem, sopon mhojem aslem,
Hem sopon ! Mhojem soponuch urlem.

Avchituch marlem varem khor,
Kosoli-i ixttagot, zal’le porim renver ghor.
Tuji darunnai konnak mhonn korum sor?
Ugddas tuzo vechona, urtolo mhojea jivitbhor.

Ixtta, sintidan jivitachem panvl mar,
Mhojea porim ghenaka angar far.
Ovisvaxiponn tea ixttachem dina monak thar,
Torui mhonntam, ixttagot moladik !
Poripurnn toren sar.

Xhubert Dabalkar

Omor Ugddas - Pri. Moreno D'Souzacho

Omor Ugddas
Pri. Moreno D’Souzacho


I

Pri. Moreno put tum Pilernecho
Sevok tum Deva-Bapacho
Porgottnar tum Devachea Utracho
Mogi tum Konknni avoi-bhaxecho.

II

Pri. Moreno amkam soddun Bapaxim gelo
Toch Bap otmeak tujea xanti ditolo
Sasnnak ugddas dovorlai Gõychea firgozancho
Boroilai itihas 4 pustokamni chodd molacho.

III

Ek huxear ani okhondd bhav amcho
Gõyam ani Gõyam bhair Deva utor porjek ditalo
‘Dor M. Rotti’ 42 vorsam sompadok tum aslo
Zoitivont tuzo vavr kednach na sompcho

IV

Sabar denneamni Devan tuka bhorlolo
Kitleoch bhaxo ulounk-borounk zanna aslo
Koknni-avoi bhaxechea mogan tum jiyelo
Omor ugddas tuzo amchea kallzant jivo astolo

Angela D’Costa,
Marra Pilerne

Monantlim fulam

Monantlim fulam

Monantlim fulam ful’lim aiz
Kallzantlim utram suttlim aiz
Sobit utram guntun hanvem
Kovit toyar kelem novem.

Monantli xokti zagoili tuvem
Panar utram boroilim hanvem
Urba mhoji vaddoili tuvem
Kovitanchem bhanddar rochlem hanvem.

Mon mhojem chintunk lagta
Apunnuch kallzantlean utor bhair sorta
Utor jednam utrak mellta
Sobit kovit tonddar gollta.

Kitleoxeoch kovita boroileo hanvem
Uzvaddak haddunk adar dilo tuvem
Tujeach khatir him utram boroileant hanvem
Oxich urba dusreank-ui diunchi tuvem.

Milton R.

Xevnnem

Xevnnem


Zori hanv
Devachi rochnna
Tori jogant Xanti na
Monis mhaka
Nodrek ghena
Bosunk gelear
Ambddun ghalta.

Bhiradd mhojem
Rukha khande
Khann mhojem
Dhortore kidde
Nachot uddot
Gaitam hanv
Git novem
Ontrolla velem

Sukh mhojem
Dhakle pile
Avoik aple
Martat ule
Punn to to …
Druxtt kasador
Jinnecho mhoje
Korta xevott

Pilank mhojeam
Na avoi atam
Uddtat babddim
Zavn niradhari
Bapui tancho
Konn zanno
Khoim asa?
Mhojem mat
Zalem khan
Kasadorachem tann!

Diogo Mathias Fernandes

Tunch kiteak visorlem go?

Tunch kiteak visorlem go?


Pormollachea zaye vori
Mog go tuzo pormollit
Suryachea porzolla vorim
Hanso go tuzo porzollit.
Punn, aiz tuzo pormoll go khoim gelo?
Aiz tuzo porzoll go khoim sanddlo?
Zaieo kednach, pormoll divnk visortat go?
Surya kednanch, porzoll divnk visorla go?…?
Zalear, tunch kiteak visorlem go?


Milton R.

Jivit Mhojem

Jivit Mhojem

Hanson khellon Moujeche dis,
Mannkule te bhurgeaponnaile.
Uddna marunk dis ani rat,
Kednach nam puro zale.
Kosloch naslo bhar mathear,
Suknnea porim uddom varear.
Kednam zalim kaim vhodd,
Jivit zavnk laglem zodd
Tornnea angant dili zababdari,
Hanxeant liplim prosna itlim.
Monantlem zai titlem vaddi
Kallzan lharar-lhar uprastalim.
Kiteak mhunn jivitachem dar,
Aplo ghutt ugtaunk ailem.
Koxtt yeun sogllech vatten,
Naka zavn, puro zalem.
Yesache vatter cholun-cholun,
Jivit mhojem hem ghuspol’lem.
Punn avchituch oxem koxem
Bhavarthachem ek khup udelem ani
Umedin iesache vatter, jivit mhojem fu’lem

Selza Lopes

Vavraddeancho ixtt

Kovita

Vavraddeancho ixtt

Vavrun disacho
Samball kortam bail-bhurgeancho
Adar magun Rochnnaracho,
Hanv ga Ixtt Vavraddeancho.

Konnsancho boro mathear ghevn
Kuddicho ghosghoxit gham’ vharovn
Pavs magun, suryachea prokasan
Pikavoll mhoji kaddtam sontosan.

Vavraddeancho Ixtt hanv, sot boroitam
Dhormancheo, ganvcheo khobrô ditam
Mhojea vavurpi sangateank vakhann’tam
Boll mell’lolea khatir Devak argam ditam.

Vavraddi mhoje mogache koxtti Ixtt
Vell mellona sarki ghalunk dixtt
Pilkavoll zalear bori dhadosbhorit
Tumche sevek asa hanv jivo Vavraddeancho Ixtt

Jose Mario Pereira. Majorda

Jivit Mhojem

kovita


JIVIT MHOJEM

Mhoje lagim suriachim kirnnam nant
Tori chondrimachem chann’nem asa
Jivitant mhojea sukh nam
Tori hanstem mukhamoll asa.
Mhoje kodde vhoddlem ghor nam
Tori lhan khomptti asa
Vhoddlem-borem jevonn nam
Tori pejecho nis asa.

Mhoje kodde nove moche nant
Tori pornnim zotim asat
Tinch zotim payank ghalun
Sonvsar maddovpachim chintnam asat.

Mhoje kodde Biblia nam
Tori Biblientli xikovnn asa
Tich xikovnn jivitant
Apnnavpachi itsa asa.

Mhoje lagim chintnachi nod nam
Tori jinnent bhorti-sukti asa
Kednam tori jivit fultolem
Devacher visvas asa.

Milton R

Saturday, July 26, 2008

FULUNK CHUKLO


FULUNK CHUKLO


Mhojea darantlo gulmohor
Ondum fulunk chuklo
Tacher patyeun mog kel’lo
Chonvorche poilinch suklo

Horxim boro dor vorsak
Pausa poilinch fultalo
Tachea pondak mog mhojo
Varea vangdda dholtalo

Ondum kainch somzona
Ragan kiteak bosla
Konnak bhivun ravla mono
Kai avaz golleak dosla

Gulmohora ! Oxench chol’lear
Fuddem zatlem koxem
Yetlo votlo hansta mhaka
Mhonttat laglam pixem



Guadalupe Dias

YAD TUJI


YAD TUJI


Fantea parar yad tuji
Surya zaun yeta
Tinsanzchea mond vellar
Ghayall korun veta

Dorya veller yad tuji
Khoddpar yeun bosta
Paim aple udkant buddoun
Xitoll hanso hansta

Chinche zhaddar yad tuji
Amurpikich humkollta
Barik barik pana modim
Varo zaun sollsollta

Dor khinnak yad tuji
Kalliz zaun dhodd-dhoddta
Tuje yadin boroitokoch
Kovitechem mol vaddta


- Guadalupe Dias

S O N D E X

S O N D E X



Dhanvtea kumpanom
Mhojem ek kam korxat ?
Ghorkar gela pordexant
Taka mhojo sondex diuxeat ?

Taka mud’dom sangat
Sarkench mone zalam hanv
Sokall sanz ,dis rat
Vhonttar ghollta
Tachench nanv

Toxem pollounk gelear
Hanga kainch unnem nam
Punn zachi chodd goroz
Toch mat hanga nam

Dhanvtea kumpanom
Sambhllat varem yeta
Mhozo sondex fafsot
Mhaka bhirant dista

-Guadalupe Dias

AMI BHETTLIM TEDNAM

AMI BHETTLIM TEDNAM


Tuji mhoji poilich bhett

Chinche pondak ghoddli

Tea disachean chinchen

Apli ambottsannui soddli





Mollban kensam ambaddo

Holluch maner soddlo

GUspun uril’lo suria gullo

Sohoz doryant poddlo





Tuje mhoje bhettechi

Vareak mosti choddli

Chondrakui ailo bhar

Ratik vengent oddly





Vhalla deger konnkek

Nazuk hatho ful’lo

Ruperi dova thembo

Loze zhaddak bhul’lo





Tuje mhoje bhetten

Soiman kelo xrungar

Surnganchea zhaddakui

Amrutacho ailo hunvar





Poile bhettecheo yadi

Monant azun ghaltat sad

Sogllem hanv visorlam

Yad asa hi ekuch yad





Guadalupe Dias
guadalupedias@yahoo.com
www.goa-world.com/goa/konkani